كشف الفنان أكرم حسني عن كواليس تحضير أغنية تيجي نسيب والذي طرحتها المطربة أنغام ضمن ألبومها الغنائي الجديد، حيث غنته لأول مرة في حفلها بجدة ليكون مفاجأة لجمهور السعودية الحاضرين الحفل.
أكرم حسني يكشف كواليس تحضير أغنية تيجي نسيب
وقال أكرم حسني في تصريحات رصدها موقع تحيا مصر: يوم التلات 2 نوفمبر 2021 الساعة اربعة الفجر قام ايهاب عبد الواحد عشان يمشي بعد سهرة طويلة عندي في البيت ايهاب مسابش فيها الجيتار من ايده هو بيغني و كلنا بنغني معاه.
وتابع أكرم حسني: بعد ما كله مشي جاتلي فكرة أغنية تيجي نسيب فكتبتها و خلصتها علي الساعة ستة الصبح ، و هموت و اكلم ايهاب عشان يجيلي يسمعها و يلحنها بس مكسوف اكلمه .. الراجل لسه ماشي من عندي من ساعتين و اكيد ملحقش ينام. الساعة سبعة صباحا بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم.
أكرم حسني: 3 ساعات إيهاب عبد الواحد ماسك الجيتار وعمال يجرب لحنية
واستكمل أكرم حسني: من الساعة تسعة للساعة اتناشر ايهاب مبيعملش حاجة غير انه ماسك الجيتار و عمال يجرب جمل لحنية في دماغه و يطلب قهوة سادة، الساعة اتناشر و عشر دقايق كان خلص اللحن و بيسجله ( بصوا الساعة اللي ورا عشان تتأكدوا ) و مكانش يعرف اني لما قولتله و هو ماشي الفجر عايزين نكررها قريب انها هتبقي قريب أوي كده.
واختتم أكرم حسني: الاغنية راحت للموزع الكبير صاحب اللمسات السحرية حسن الشافعي عشان يحط بصمته عليها و تطلع بالشكل اللي انتوا سمعتوه. اغنية تيجي نسيب اتكتبت و اتلحنت في خمس ساعات و استهلكت نص كيلو بن وسط محوج ، بس عشان طالعة من القلب و لحنها ملحن عبقري بيحس بكل كلمة و يترجمها ل لحن ربنا كرمنا بأن اللي يغنيها تبقي فنانة معجونة احساس و فن و حلاوة صوت و حضور طاغي و مكانة كبيرة في قلوب جمهورها في كل حتة في الوطن العربي .. انغام.
إيهاب عبد الواحد وكواليس التعاون مع أكرم حسني في أغنية تيجي نسيب
وقال إيهاب عبد الواحد في تصريحات تليفزيونية أيضا: أكرم حسني ده مشكلة، وأنتا قاعد معاه قالي أنا عايز أسمعك حاجة، وقالي كلمات أغنية تيجي نسيب وطريقته كانت بتضحك، وبعدين دخل في حالة تانية وهو بيكمل الأغنية وأنا جالي ذهول من أسلوبه ومن الكلمات وقلتله مين اللي كتب الكلام ده؟ ضحك وقالي والله أنا، وبدأ يحكيلي التفاصيل.
واختتم: الأغنية دي النفس فيها لحن، والسكوت لحن، والعظمة اللي فيها وكلامها المتراقب هترقصك ودي حالة غريبة وأول مرة تحصل.
