محمد الأتربي.. فخامة الاسم تكفي

 
قائد تطوير بنك مصر واسم معروف في مجال البنوك، وخبرته في بنك مصر هي اللي تتكلم عنه وكانت أساس اختياره كرئيس تنفيذي للبنك الأهلي، تعالوا نعرف مع بعض في الفيديو مين هو محمد الأتربي؟.

محمد الأتربي من مواليد يناير 1955، دخل تجارة عين شمس وخد البكالوريوس، هو مش  مجرد مدير بنك، لا ده شخص عنده رؤية، وخدها من أول سلمة زي ما بنقول في الأمثال الشعبية، لا ده كمان يتقال عليه بابا المجال، وده بسبب خبرته المصرفية اللي وصلت لـ 35 سنة .
الأتربي معروف عنه في المجال إنه بيحب الشباب وبيحب يساعدهم ويقف في ضهرهم، وممكن تسمع حكايات كتير من شباب دلوقتي بقوا رجال أعمال معروفين وتعرف أد ايه هو ساعدهم أنهم يكبروا ويدخلوا السوق.
بنك مصر في عهد الأتربي حقق أرقام وقفزلت كبيرة جدا، ده لأنه  كان مهتم جدا بالرقمنة، ودايما كان بيساعد العملاء أنهم يحققوا كل اللي محتاجينه أون لاين، لإنه كان دايما يقول إن التواصل مع العملاء بشكل جيد هو أساس نجاح أي بنك، وطبعا كلنا لاحظنا اسم بنك مصر الفترة الأخيرة بقى معروف وبينافس بقوة بفضل خبرة الأتربي.
الأتربي بدء حكايته في البنوك في 1977 مع البنك العربي الأفريقي الدولي، وبعدها اتنقل لبنك الائتمان الدولي، وفي 1983 انضم لفريق عمل بنك مصر الدولي، اللي دلوقتي بقى بنك قطر الوطني.
وخلال 22 سنة من عمره شغل مناصب مصرفية عليا ورفيعة المستوى وطبعا خد خبرات كتير في العمل المصرفي بشكل عام
لحد ما وصل في 2005 للبنك العقاري المصري، وفي 2009 كان العضو المنتدب لبنك الاستثمار العربي، لكنه في 2011 قرر يرجع البنك العقاري مرة تانية.
وطبعا لأن سمعته كانت في المجال سابقة وأسمه كان علم، اتعين رئيس تنفيذي وعضو منتدب للبنك المصري الخليجي والكلام ده في يناير 2013.
وفي 2015 تولى رئاسة مجلس إدارة بنك مصر، ومش بس كده ده وصل لبنان وبقى رئيس مجلس إدارة بنك مصر لبنان.
الاتربي من نوعية المصرفيين أصحاب الكاريزما والحضور في أي مكان يروح فيه أو مؤتمر بيحضره وكان ضمن كتيبة المصرفيين المصريين اللي رسموا خطة إنقاذ السوق المصرفي في وقت الأزمة الكبيرة في 2023 وكان من بين قادة البنوك اللي قدر يعدي كل الأزمات ويحقق ارقام تكسر اللي قبلها في الأرباح والايردات وعنده دايما حلول بره الصندوق خلته واحد من بين أهم رجال البنوك في مصر والشرق الأوسط.