يا ترى مصر والسعودية ناويين على إيه ؟ وايه سر فتح خزائن المملكة للسيسي؟ وليه السعودية قررت تحول ودايعها فى البنك الركزي الى استثمارات مباشرة؟ وايه تفاصيل صفقة المليارت الكبرى اللى بيتم التحضير ليها فى الكواليس؟
مصر والسعودية بينهم علاقات تاريخية ممتدة عبر مئات السنين والقاهرة والرياض طول عمرهم سند لبعض ومفيش دولة احتاجت التانية الا ولقتها فى ضهرها.. والرئيس السيسي اتكلم أكتر من مرة عن الدور الكبير للمملكة فى دعم مصر خصوصا فى اظلوقات الصعبة اللى مرت بيها من بعد 2011 ولحد دلوقتى وعلى الجانب التانى الملك سلمان بن عبدالعزيز وولى العهد الأمير الشاب محمد بن سلمان مفيش فرصة بتمر اللى وبيعبروا عن أهمية مصر لدول المنطقة ووقفاتها التاريخية مع اخواتها فى المملكة.. عشان كده مش غريب أبدا ان يكون فيه تعاون اقتصادي ضخم بين مصر والسعودبة تعاون فيه كل الأطراف كسبانة.. مصر اللى بتحاول تجذب أكبر قدر من روؤس الأموال والاستثمارات الأجنبية المباشرة.. والمملكة اللى بتتوسع فى السوق عندنا وبتحاول تقتنص الفرص المتاحة
طب ايه الجديد فى العلاقات بين القاهرة والرياض؟
بص يا سيدي فى بداية شهر اغسطس اللى فات وزير الاستثمار السعودي خالد الفالح كان فى زيارة رسمية لمصر وعقد اجتماع مع مسؤولين فى الحكومة المصرية أكد خلاله ان المسئولين فى المملكة وعلى راسهم الملك سلمان وولى العهد مهتمين جدا بزيادة الاستثمارات السعودية فى مصر خلال الفترة الجاية وقال ان الحكومة عندها تكليفات بزيادة استثمارات صندوق الاستثمارات العامة السعودي في مصر
وزير الاستثمار السعودي أعلن مفاجأة سعيدة وقتها وقال ان المملكة عندها توجه بتحويل ودائعها في مصر إلى استثمارات وخد بالك الودايع دي بمليارات الدولارات كان السعودية ادتها لمصر لدعم الاحتياطي النقدي فى أكتر من مناسبة وللحفاظ على استقرار الاقتصاد وتجنب تعرضه لأى هزة من الهزات
ومن يومين وزير الاستثمار المصري حسن الخطيب أكد فى تصريحات ليه ان مصر بتستهدف توقيع اتفاقية حماية الاستثمارات مع السعودية خلال الـ 15 يوم الجايين وقال ان الحكومة بتنظر للاتفاقية دي كأولوية وبتعتبرها شغلها الشاغل من دلوقتى ولحد تحديد موعد التوقيع عليها مع الجانب السعودي
وحسب آخر تقرير صادر عن البنك المركزي بشأن الوضع الخارجي للاقتصاد المصري بتمتلك السعودية حاليا ودايع في البنك المركزي بقيمة 10.3 مليار دولار منها 5 مليارات دولار ودائع قصيرة الأجل وأخرى بقيمة 5.3 مليار دولار متوسطة وطويلة الأجل،
طب ليه السعودية بتعمل كده مع مصر؟
السعودية بقيادة الملك سلمان وولى العهد الأمير محمد بن سلمان عارفين قيمة مصر ومكانتها ودورها المحوري فى الشرق الأوسط وكمان مدركين للدور المهم اللي لعبه الرئيس السيسي فى ملفات كتير ومهمة على راسها الملف الفسطيني وازاى وقف ودعم وساند ورفض كل محاولات الترغيب والترهيب لتهجير أهالى قطاع غزة وعشان كده السعودية مهتمة بدعم مصر ومساعدتها على الخروج من الوضع الاقتصادي الحرج اللى كانت بتمر بيها فى السنين الأخيرة .. ومصر مقدرة وقفة اخواتنا فى السعودية وبتحاول ترد الجميل للملكة وبتذلل اى عقبات بتواجه المستثمرين السعوديين
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
