ايه حكايه الاستثمارات السعودية الجديدة اللي جاية في الطريق وايه قصة ال20 مليار دولار اللي هتقلي شكل الاستثمار والاقتصاد في مصر وامتي الفلوس دي بتدخل مصر وايه اللي حصل في الساعات الأخيرة.. خليكم معانا للآخر وهتعرفوا التفاصيل في الفيديو ده
زي ما احنا عارفين إن دول الخليج العربي كان ليها السبق في الاستثمار في مصر وخاصة وقت الأزمات ودا اللي أداها ميزة كبيرة في السوق المصري وشفنا إزاي صفقة رأس الحكمة الإماراتية غيرت بوصلة الاقتصاد المصري والاستثمارات وفتحت الطريق للخروج من أزمة نقص الدولار اللي حصلت وارهقت الدولة والمواطنين بسبب ارتفاع الأسعار والخدمات.
وبعد الصفقة الإماراتية بدأت الاستثمارات والتدفقات الأجنبية والعربية تهل من كل حتة سواء من الاتحاد الأوروبي أو صندوق النقد الدولي أو الصين ودول الخليج طبعا زي الإمارات اللي مكتفتش بصفقة رأس الحكمة لكن عملت صفقات تانية ضخمة في قطاع الطاقة النظيفة على سبيل المثال ومنها صفقة شركة أيميا باور لتنفيذ محطة طاقة بحوالي 2 مليار دولار وغيرها من المشروعات.
السعودية كمان وهي أكبر مستثمر عربي في مصر باستثمارات تزيد على 55 مليار دولار قائمة بالفعل وفيه دلوقتي 6225 شركة صناعية سعودية تعمل بمصر باستثمارات تبلغ 30 مليار دولار، ودا عيرغ518 شركة مصرية تعمل بالسوق السعودية، و285 علامة تجارية مصرية منتشرة بالمملكة ودا حسب أرقام وبيانات 2023.
وفي الفترة الأخيرة قررت السعودية كمان تدخل بتقلها في السوق المصري وقبل كده عملت خطوة مهمة جدا وهي تحويل الودائع السعودية في البنك المركزي المصري واللي بتوصل 10 مليار دولار الي استثمارات في السوق المصري وفي وبداية أغسطس اللي فات وزيرة التخطيط والتنمية الاقتصادية والتعاون الدولي رانيا المشاط استقبلت وزير الاستثمار بالمملكة العربية السعودية خالد الفالح واتفقوا على عقد مزيد من الشراكات والاستثمارات بين القطاع الخاص في مصر والسعودية
طيب ايه الجديد في قصة الاستثمارات السعودية الجديدة في مصر ؟
شوف حضرتك في الساغات الأخيرة وزير الخارجية والهجرة وشئون المصريين بالخارج الدكتور بدر عبد العاطى كشف إن فيه جهود كبيرة بتبذل من جانب مؤسسات الدولة في مصر والمملكة العربية السعودية للانتهاء من بعض الاتفاقيات الطموحة لدعم الاستثمار واللي هتكون الأولى من نوعها وهيكون ليها دور كبير في تعزيز العلاقات الاستثمارية والتجارية بين البلدين، بجانب إحداث نقلة كبيرة في العلاقات الاقتصادية... وزير الخارجية قال إنه بمجرد إقرار الاتفاقيات هتكون فيه مجالات أوسع لمضاعفة الاستثمارات السعودية في مصر وخطوة أولية تحت مظلة مجلس التنسيق المصري السعودي واللي هيكون تحت رعاية ورباسة الرئيس عبد الفتاح السيسى، وولى العهد السعودى الأمير محمد بن سلمان.
طيب الأرقام بتقول ايه ؟
زي ما قلنا لحضراتكم السعودية دائما كانت بتحل المركز الأول عربيا ودوليا كمان في سوق الاستثمارات المصرية والجديد بقي إنه متوقع تضخ السعودية استثمارات ضخمة مابين ال15و20 مليار دولار في الفترة الجاية من خلال عقد صفقات استثمارية ضخمة بالفعل والصفقات دي حسب المعلومات بتشمل الاستحواذ على بعض الشركات المصرية بخلاف تنفيذ مشروعات استثمارية كبرى وزي ما احنا عارفين سبق لصندوق الاستثمارات العامة السعودية في سنة 2022 الاستحواذ على حصص مملوكة للحكومة المصرية في 4 شركات مدرجة بالبورصة بقيمة 1.3 مليار دولار، منها شركة أي فاينانس للاستثمارات المالية والرقمية، وأبو قير للأسمدة والصناعات الكيماوية، وشركة مصر لإنتاج الأسمدة موبكو، والإسكندرية لتداول الحاويات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
