شهر العسل اللي اقرته الحكومة بخصوص تخفيف الأحمال قرب ينتهي وخلاص الكهرباء هترجع تقطع تاني.. يا تري اية حكاية الموضوع ده.. وهل فعلا الكهرباء هترجع تقطع تاني علي الناس
في الـ21 من شهر يوليو اللي فات مجلس الوزراء قرر وقف العمل بخطة تخفيف الأحمال علي الشبكة الموحدة للكهرباء بعد ما وزارة الكهرباء والطاقة المتجددة كانت شغالة بيها من اكتر من سنة كاملة بسبب زيادة الاحمال علي الشبكة الموحدة للكهرباء، واللي وصلت فيها الاحمال لارقام أول مرة توصل لها في التاريخ، ده غير زيادة السرقة وانتشارها علي معظم الخطوط وبالتالي الأنتاج اللي بتحققه محطات توليد الكهرباء بقي اقل من الأستهلاك المطلوب يوميا لتغطية احتياجات المواطنين .
طيب اية اللي هيحصل في الفترة اللي جاية بخصوص تخفيف الأحمال؟.
مجلس الوزراء كان اقر وقف العمل بخطة تخفيف الأحمال في الفترة من 21 يوليو اللي فات وحتي الـ15 من سبتمبر الحالي، وهنا خلاص شهر العسل اللي اقرته الحكومة بوقف تخفيف الأحمال قرب ينتهي، ولحد اللحظة دي مجلس الوزراء ماصدرش اي قرار رسمي سواء بعودة تخفيف الاحمال وقطع الكهرباء لمدة ساعتين زي ما كنا شغالين قبل قرار وقف تخفيف الأحمال أو استمرار وقف خطة تخفيف الأحمال وتوفير المواد البترولية اللي محطات توليد الكهرباء عايزاها علشان تفضل شغالة ومتقفش عن التشغيل .
مصادر بوزارة الكهرباء والطاقة المتجددة، قالت أن مركز التحكم القومي للكهرباء ما اصدرش اي قرارات رسمية سواء بالعودة لتطبيق خطة تخفيف الاحمال واللي كانت مطبقة لمدة ساعتين، أو استمرار وقف العمل خطة الوقف وانه في خلال الايام اللي جاية هيتم مناقشة الموضوع في مجلس الوزراء وهيصدر قرار نهائي بخطة العمل الجديدة .
المصادر كملت كلامها وقالت، أن الاقرب للعمل في الخطة الجديدة هو استمرار وقف العمل بخطة تخفيف الأحمال خصوصا في ظل الجهود اللي بتقوم بيها الحكومة لتوفير المواد البترولية اللي بتحتاجها محطات توليد الكهرباء سواء غاز طبييعي او مازوت أو غيرها من المواد البترولية، بالاضافة الي الجهود اللي بتقوم بيها وزارة الكهرباء والطاقة المتجددة لاحكام ووقف وقائع سرقة التيار الكهربائي، بالاضافة الي جهود وقف العمل بنظام الممارسة في استهلاك الكهرباء من خلال تركيب العدادات الكودية الاجبارية وفرص تسعيرة اجبارية علي المواطنين واللي بتوصل لـ214.5 قرش لكل كيلووات ساعة واللي هيا سعر التكلفة الحقيقة لانتاج الكهرباء.
المصادر قالت برضوا، أن الفترة الحالية الاحمال الكهربائية علي الشبكة القومية للكهرباء تراجعت بشكل كبير خصوصا مع انخفاض درجات الحرارة واللي ادي لانخفاض وتراجع تشغيل المواطنين للمبردات والتكييفات وبالتالي في تراجع فس استهلاك محطات توليد الكهرباء للمواد البترولية، وده بيدي فرصة لوزارة الكهرباء والطاقة المتجددة لمدة وقف خطة تخفيف الأحمال وعدم تطبيقها في الايام اللي جاية خصوصا اننا داخلين علي فصل الشتاء واللي فيه الاحمال الكهربائية بترجع لاقل معدلاتها
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
