الفاتورة تجاوزت آلاف الجنيهات.. مواطنون يستغيثون بمجلس الوزراء للتدخل

فاتورة الكهرباء

أثار ارتفاع سعر فاتورة الكهرباء عن شهر أغسطس حالة من الغضب بين نشطاء مواقع التواصل الاجتماعي، خاصة أن النشطاء رصدوا ارتفاعا كبيرا في سعر فاتورة أكثر من ثلاثة أضعاف قيمة الفاتورة عن الشهر السابق.

ارتفاع قيمة فاتورة الكهرباء المحاسبية

وتصدر ارتفاع قيمة فاتورة الكهرباء المحاسبية هذا الشهر تريند مصر عبر مواقع التواصل الاجتماعي، حيث زادت شكاوي المصريين من الفاتورة، فشكا بعضهم أن الفاتورة ارتفعت من 800 جنيه الشهر الماضي، إلى 1800 جنيه هذا الشهر، وطالب العديد بتقديم شكوى لرئاسة الوزراء، بشأن زيادة فاتورة الكهرباء، التي وصفوها بأنها "مبالغ فيها".

وقالت الناشطة سارة حسن: "فاتورة الكهرباء.. هو المرتب فيه كام 1800 علشان ندفع في بند واحد المبلغ ده... فين المسئول... كل شهر كانت الفاتورة 800 جنيه وهذا الشهر 1800 جنيه، ما السبب ونفس الاستهلاك، وفي حالة التأخير في الدفع، يتم دفع 7% فائدة".

زيادة فاتورة الكهرباء بلغت 40%

وعلق البلوجر طه أحمد المليجي قائلًا: "لسه متخانق معاهم النهارده الشريحه السادسه زادت 50%... وبأثر رجعي من 1/8 والقرار أصلا صدر في 20/8 حسبي الله ونعم الوكيل"

أما الناشطة مها ميتري كيرلس فعبرت عن غضبها قائلة: "الزياده من الشهر ده 40% المحصل لسه معدى النهارده، ووجدت الفاتوره زادت عن كل شهر حوالى 400 جم.. ليه؟"

وقالت الناشطة مها فوزي: "الفاتورة زادت من الشهر الماضي نفس الاستهلاك، السنة الماضية كنت بدفع مابين 700 /800 الشهر الماضى 1065 جنيه"

وعبرت الناشطة سلمى سامي عن غضبها قائلة: "يعني أنا الشهر الماضي جاءت الفاتورة 700 جنيه وهذا الشهر 1700 جنيه، ليه خير لماذا كل هذه الزيادة"

أما البلوجر إبراهيم كامل فقال: "فاتورة الكهرباء جاءت لي 2720 جنيه بزياده أكثر من 65%"

نعمل شكاوى جماعية على رئاسة الوزراء

وعلقت الناشطة ريهام محمد قائلة: "نعمل شكاوى جماعية علي رقم رئاسة الوزراء، ويسمعوا اننا بنشتكي حتي لو مش هيعملوا حاجة بس علي الأقل نسمعهم شكوانا"

أما الناشط رامي أحمد فقال: "فاتورة الكهرباء وصلت.. دي الفاتورة بتاعتي جاي إني مدين معرفش ليه مع إني دافع الشهر الي فات تيجي نعرف تحسب الفاتوره ازاي... أبعد عن الشريحه الأولي والثانيه، ملناش دعوه بيهم لأن استهلاكنا هيكون أعلي منهم، خلينا الثالثه والرابعه حتى ال 200 ك بتضرب الفاتوره في 95 قرش، فوق الـ 200 كيلو بتحسبهم لوحدهم تضرب في 1,55 قرش معاك حتى 350 ك فوق الـ 350 كيلة ملناش دعوه بيهم دول عايزين جمعية"

وقال الناشط أبو ليلة: "فاتورة الكهرباء 2905 في شهر أغسطس بس خلاص.. ليس عندي تكييف.. الشقة كانت فاضيه أسبوع كامل في هذا الشهر"

وعلقت الناشطة سماح محمد قائلة: "الكهرباء زادت اضعاف الـ 200 جنيه معدتش بتكمل أسبوع وكل شحنه بيخصموا 20 جنيه نظافه هنلاحق على كل ده منين حسبي الله ونعم الوكيل"

وقال البلوجر عمرو مكرم: "النهاردة جاتلي فاتورة الكهرباء عن الشهر اللي فات ثلاثة أو أربعة أضعاف فاتورة الشهر اللي قبله واللي كانت برضه هي كمان ساعتها ثلاثة أو أربع أضعاف الشهر اللي قبل قبله! بصراحة الواحد شايل هم اليوم اللي ممكن تيجي فيه الفاتورة أضعاف اضعاف ومايكونش ساعتها نقدر ندفع أونسدد قيمتها أو تمنها...! ربنا يستر علينا في بلدنا اللي كانت زمان بيقولوا عليها: جنة الفقراء...!"

فاتورة الكهرباء زادت كدا كتير علينا يا حكومة

أما الناشطة عفاف حليم فقالت: "معقول فاتورة الكهرباء 2200 وفي نفس الوقت ده السنه اللي فاتت كانت 700!! كدا كتير علينا يا حكومة بصي انتي تاخدي المرتب وتدفعي الفواتير وتسددي الديون والعلاج وتأكلينا لو عرفتي"

وقال الناشط رأفت عبد المجيد: "أنا عندي عداد الكهرباء القديم اقصي فاتورة كانت بتيجي 1200 الشهر اللي فات 2500 الشهر ده 3500 واللي بيقرا مجاش أصلا الشهر ده السلم وغرفة البواب 3000 الشهر الماضى 3500 الشهر ده كانت بتيجي 300 جنيه هل ده معقول"

وعلقت البلوجر مروة الجمال قائلة: "فاتورة الكهرباء الشهر اللي فات كانت 700 جنيه الشهر ده 1500 جنيه! نفس الاستهلاك ونفس كل حاجة ومفيش أي جهاز جديد دخل البيت هو في ايه!"

وقال الناشط هاني النجار: "فاتورة الكهرباء ارتفعت من 800 إلى 2000جنيه..."

وردت الناشطة معتزة خالد معطي قائلة: " 1765 مش ميلاديا... لأ جنيه دى فاتورة الكهرباء ضربنا الرقم القياسي الناس كلها على الفيسبوك بتقول الفواتير ظهرت والأرقام اضاعفت اتخضيت فعلا الموضوع مبالغ فيه"